حالة هذا الأسبوع ( 31 )  : معاذ طه .. 7 شهور .. من المنصورة

الحول الوحشي للاطفال الرضع

مش طبيعي ابدا ان احنا نلاقي بيبي عنده حول وحشي .. دي حاجة نادرة جدا .. كتير قوي يا جماعة بيكون الحول الوحشي عند البيبيهات عبارة عن جرس انذار لمشكلة موجودة عند البيبي .. مشكلة اكبر من الحول نفسه

لما يكون بيبي صغير عنده عين شايفة والعين التانية مش شايفة كويس .. طيب انا كأم هاعرف منين .. البيبي عمره ما هيقول " يا ماما انا عندي عين كويسة والعين التانية مش شايف بيها كويس "

لكن سبحان الله .. البيبي اللي عنده عين بتشوف وعين مش بتشوف كويس .. العين الضعيفة بتحول .. وعادة تحول لبرة زي معاذ كده .. كأن البيبي  عايز يقول لنا " الحقوني يا جماعة .. عيني الحولة دي فيها مشكلة "

 كتيرلما بنفحص البيبيهات اللي عندهم حول وحشي نلاقي عندهم مرض خلا النظر ضعيف جداً وعشان كدة العين حولت لبرة .. احنا بنسمي الحول ده " الحول الوحشي للاطفال الرضع "

انا دايماً بأقول للأمهات .. يا جماعة أي بيبي عنده حول وحشي يعني عينه حدفت لبرة .. دي حاجة مهمة جداً .. لازم البيبي يتفحص فوراً أحسن يكون عنده حاجة في عينه أهم من الحول ولازم تتعالج بسرعة ( زي مشاكل الشبكية اللي بتيجي من حضانات المبتسرين .. وزي المية البيضاء عند الاطفال الرضع ..وغيرها من الامراض الخلقية اللي بتضعف النظر )

طيب انا حابب اقول لكم معلومة مهمة .. تصدقوا ان الاطفال الصغيرين اللي عندهم مية بيضاء دايماً بنكتشفهم في عيادة الحول ..

تصدقوا ان البيبيهات اللي عندهم انفصال في الشبكية دايماً بنكتشفهم في عيادة الحول ..

تصدقوا ان أي بيبي لما يكون مش شايف بعين من عينيه أول حاجة تحصل له ان عينه تحدف لبرة - يعني حول وحشي 

معاذ أول ما مامته جابته العيادة قلت لها الكلام ده .. وقلت لها " أول حاجة يا مدام لازم نفحص عين معاذ ونتأكد انه بيشوف بيها كويس .. مش مهم الحول دلوقتي .. خلي الحول ده آخر حاجة نفكر فيها .. الأول نطمن على الولد "

معاذ قضى معايا رحلة سعيدة من الفحوصات والاشعات ورسوم كهربية للشبكية والعصب البصري .. والحمد لله لقينا الولد زي الفل .. ما فيهوش أي حاجة ..

  " معاذ يا مدام نظره ما فيهوش اي مشكلة .. الحول اللي عنده ناتج من ضعف في عضلات العين .. ولازم نعمل عملية بسرعة أحسن العين الحولة دي هتضعف مع الوقت ويحصل لها كسل "

" معاذ لسه 7 شهور يا دكتور جمال .. مانستنى شوية لما يكبر يمكن العضلات تقوى والحول يتعدل لوحده ... أو أقول لك يا دكتور مانستنى شوية لما يقدر يستحمل العملية ..  " 

الامهات هما هما .. نفس الكلام .. مانستنى شوية ..  لما يكبر .. الحول هيتعدل لوحده ... عشان يستحمل .. كل الامهات نفس الكلام بالمللي

 يا جماعة الحول الوحشي الخلقي مش بيتعدل لوحده أبداً .. مهما استنيتوا برضة حتعملوا العملية .. كل مانعملها بدري كل ما كان احسن عشان العين الحولة ماتضعفش او تكسل .. وصدقوني نتايج العمليات عند الاطفال دول ممتازة .. يا جماعة طبياً مفيش أي مشكلة اننا نعمل عملية حول لطفل عند 4 شهور بس .. مفيش أي مشكلة والله .. بالعكس .. دي نتايج العمليات عند البيبيهات دول بتكون هايلة

مامة معاذ اقتنعت بكلامي .. جهزته للعملية وعملتها له بعد يومين ..

معاذ جاني النهاردة في المتابعة بعد اسبوع من العملية ...

لا والله .. حاجة غير .. الولد شكله حتى بقى حاجة تانية .. ده انا معرفتوش .. كأنه واحد تاني .. تصدقوا يا جماعة كل ما أحط صورة معاذ في محاضرة عن الحول الوحشي الخلقي زمايلي الدكاترة يقولوا لي ده مش ده يا دكتور جمال .. والله انا بأبقى في منتهى السعادة لما باسمع كده .. بأحس قد ايه ان ربنا جعلني سبب في تغيير مصير انسان ومستقبله .. انسان اتحول من واقع .. لواقع تاني خالص .. الحمد لله .. يستاهل الحمد   

حمد الله على سلامتك يا أستاذ .. وألف مبروك ... بس ابقى افتكرني

د. جمــال صبـــحي