حالة هذا الأسبوع : أ. أ.ع.. القاهرة

الحول الوحشي الخلقي

الحول ده نادرعند البيبيهات .. وكتيرلما بنفحص الاطفال دول بنلاقي عندهم مشكلة كبيرة في العين خلت النظر ضعيف جداً وعشان كدة العين حولت لبرة .. يعني حول وحشي ..

وعشان كدة دايماً بأقول للأمهات .. يا جماعة أي بيبي عنده حول وحشي لازم يتفحص فوراً أحسن يكون عنده حاجة في عينه أهم من الحول ولازم تتعالج بسرعة ( زي مشاكل الشبكية اللي بتيجي من حضانات المبتسرين .. وزي المية البيضاء عند الاطفال الرضع .. )

تصدقوا يا جماعة ان الاطفال الصغيرين اللي عندهم مية بيضاء دايماً بنكتشفهم في عيادة الحول .. تصدقوا ان لما بيبي يكون مش شايف بعين من عينيه أول حاجة تحصلها ان العين تحدف لبرة - يعني حول وحشي !!! 

أما الحول الوحشي الخلقي الحقيقي اللي مش بنلاقي فيه أي مشاكل في العين زي حالة أ.أ. كدة فده مالوش علاج إلا العملية .. وزي الحول الانسي الخلقي كتير من الامهات يقولوا لي مانستنى شوية لما البيبي يكبر يمكن الحول يتعدل لوحده ... أو مانستنى شوية لما يبقى يكبر عشان يستحمل العملية ..

يا جماعة الحول الوحشي الخلقي مش بيتعدل لوحده أبداً .. مهما استنيتوا برضة حتعملوا العملية .. كل مانعملها بدري كل ما كان احسن عشان العين الحولة ماتضعفش او تكسل .. وصدقوني نتايج العمليات عند الاطفال دول ممتازة .. زي عملية أ.أ. كدة ...

حمد الله على سلامتك يا أ...

د. جمــال صبـــحي