حالة هذا الأسبوع ( 410 )

جنات .. 5 سنين .. من أسيوط

" الحول الأنسي عند الأطفال "

الحول ده هو اشهر أنواع الحول ودايماً بأقول للامهات لما بنتك يظهر عندها حول أنسي – يعني عينها تخش لجوه كده – لازم نفكر إنه النوع ده .. صحيح هو شبه أنواع كتير من الحول لكن بالفحص بنقدر نفرق بين الحول الأنسي والأنواع التانية

والحول ده ملوش علاج إلا العملية .. كتير من الامهات يقولوا لي مانستنى شويه لما بنتي تكبر يمكن الحول يتعدل لوحده

يا جماعة الحول الأنسي ده مش بيتعدل لوحده أبداً .. مهما استنيتوا هتعملوا العملية برضه .. وكل مانعملها بدري كل ما كان احسن عشان العين الحوله ماتضعفش او تكسل .. وصدقوني نتايج العمليات عند الاطفال دول ممتازة .. وغالباً بنحتاج عملية واحدة عشان نعدل الحول .. وده اللي حصل مع جنات السكر دي .. وبعد العملية الحمد لله بقت قمر .. ومش هتحتاج في المستقبل أي حاجة تانية ان شاء الله