حالة هذا الاسبوع ( 319 ) براء .. من القاهرة

بمناسبة براء حالة هذا الاسبوع أو قمر هذا الأسبوع أحب أتكلم النهارده عن ضرورة علاج الحول بدري على أد ما نقدر

لما يظهر حول عند بيبي كتير من الأمهات بيرفضوا تماماً يعملوا عمليه وهو صغير كده .. ويقولوا لي طيب نستنى شويه لما يكبر يمكن الحول يتعدل لوحده ... أو نستنى شويه لما يكبر عشان يستحمل العمليه .. أو لو عملنا العمليه دلوقتي الحول أكيد هيرجع تاني بعد شويه  

يا جماعه فيه حاجتين بيحكموا قرار توقيت العمليه :

-       أول حاجه هل الحول ده من النوع اللي بيضعف النظر ولو سبناه فيه ضرر كبير على قوة إبصار العين الحوله يبقى القرار هنا لازم نعمل العمليه دلوقتي وكل مانعملها بدري كل ما كان احسن عشان العين الحوله ماتضعفش او تكسل .. مينفعش نأجل العمليه خالص .. ومن الثابت طبياً أنه يمكن عمل عملية الحول من غير أي مشكلة من أول سن 4 شهور

-       تاني حاجه بتحكم قرارنا في توقيت العمليه هو التأثير الإجتماعي لشكل الحول على نفسية الطفل .. فلو فيه حول عند بيبي من أنواع الحول الغير ضارة على إبصار العين ( مثل الحول المتقطع مثلاً ) .. في الحالات دي ممكن جداً تأجيل العمليه لسن 4 سنين على دخول المدارس لما الطفل يكون كبر وابتدا يفهم يعني ايه تنمر وكده

براء لما جالي من 10 سنين كان عنده حول لو سبناه كان هيأثر جداً على إبصار العين الحوله .. وكان لازم قرار العمليه وهو صغير كده .. وطبعاً لازم نشكر مامته اللي وافقت على عمل العمليه في السن دي .. والنهارده هي فرحانه جداً انها أخدت القرار الصح في الوقت الصح .. والدليل على كده قمر هذا الأسبوع اللي كبر وبقى أطول مني وعينيه الحمد لله زي الفل