حالة هذا الأسبوع ( 284 )

محمد .. سنة وشهرين

" الحول الأنسي للأطفال الرضع "

دايماً بأقول للأمهات لما البيبي بتاعك يظهر عنده حول أنسي – يعني عينه تخش لجوه كده – في أول 6 شهور من عمره فأول احتمال تفكروا فيه هو الحول الأنسي للأطفال الرضع .. صحيح الحول ده يشبه أنواع تانيه كتير من أنواع الحول .. لكن بالفحص بنقدر نفرق بين الحول الأنسي للأطفال الرضع والأنواع التانيه

و دايماً بأقول للأمهات .. الحول ده ملوش علاج إلا العملية .. وكتير منهم يقولوا لي طيب نستنى شويه لما البيبي يكبر يمكن الحول يتعدل لوحده

يا جماعة الحول الأنسي للأطفال الرضع مش بيتعدل لوحده أبداً .. مش بيتعدل إلا بالعملية .. وكل منعمل العملية بدري كل ما كان أحسن عشان العين الحوله ماتضعفش أو تكسل .. وصدقوني نتايج العمليات عند الاطفال دول بتكون ماشاء الله ممتازة .. ونادراً جداً لما بنحتاج لهم عملية تانية