حالة هذا الأسبوع ( 257 )

" الحول الأنسي الخلقي "

الحول ده هو اشهر أنواع الحول ودايماً بأقول للامهات لما البيبي بتاعك يظهر عنده حول أنسي – يعني عينه تخش لجوه –  في اول 6 شهور من عمره فأول احتمال تفكروا فيه هو الحول الأنسي الخلقي .. صحيح هو شبه أنواع كتير من أنواع الحول .. لكن بالفحص بنقدر نفرق بين الحول الأنسي الخلقي والأنواع التانية  

والحول ده ملهوش علاج إلا العملية .. كتير من الامهات يقولوا لي مانستنى شويه لما البيبي يكبر يمكن الحول يتعدل لوحده

يا جماعة الحول الأنسي الخلقي مش بيتعدل لوحده أبداً .. مهما استنيتوا هتعملوا العملية برضه .. وكل مانعملها بدري كل ما كان احسن عشان العين الحوله ماتضعفش او تكسل .. وصدقوني نتايج العمليات عند الاطفال دول ممتازة .. وغالباً بنحتاج عملية واحدة عشان نعدل الحول .. وده اللي حصل مع البنت الأمورة دي .. وبعد العملية الحمد لله بقت زي الفل .. ومش هتحتاج في المستقبل أي حاجة تانية ان شاء الله

حمد الله على سلامتك يا حبيبتي