حالة هذا الأسبوع (27 ) : مايا الطرابلسي .. سنتين .. من سوريا

نوع الحول : يوم " حلو " ويوم " وحش "

أولاً الف شكر لباباها ومامتها انهم وافقوا اني استخدم صور " مايا " عشان اشرح للناس النوع الغريب ده والنادر جداً من انواع الحول

انا بقى لي ياجماعة اكتر من 30 سنة شغال في التخصص ده .. شفت عشرات الآلاف من الاطفال اللي عندهم حول .. شفت انواع من الحول بعدد شعر راسي .. لكن نوع الحول اللي عند " مايا " ده ما شفتوش في حياتي كلها الا مرتين بس مسجلهم عندي .. وكانوا ولدين .. ذكور يعني .. كان من حوالي 20 سنة كده .. أما " مايا " فهي أول بنت اشوفها عندها الحول الغريب ده  وتالت حالة اشوفها في حياتي .. انا سعيد جداً بيها .. وسعيد جداً جداً بنتيجة عمليتها الرائعة .. نخش بقى في الموضوع

النوع ده من الحول ياجماعة اسمه العلمي:

Circadian Esotropia   أو Cyclic Esotropia

مش لاقيله ترجمة مناسبة فقررت اسميه :

حول يوم " حلو " ويوم " وحش "

زي ما بيقولوا عليه في الكتب:

" The good day " and " The bad day "

في كل المراجع الطبية محدش لحد دلوقتي عنده تفسير للحول ده .. يمكن عشان نادر جداً مفيش حالات كفاية نقدر نعمل عليها دراسات .. كل اللي قدرنا نعمله اننا نقف مندهشين ومستعجبين من الاطفال دول اللي عندهم الحول ده .. أقول لكم ليه

الاطفال اللي عندهم الحول ده ياجماعة عينيهم بتحول يوم آه .. ويوم لأ .. بنظام عجيب مابيتغيرش أبدا .. بيمشوا زي الساعة.. يوم يبقى الطفل أحول جداً وده اليوم الوحش .. اليوم اللي بعده يبقى طفل طبيعي جداً وده طبعاً اليوم الحلو .. ازاي؟ .. ما نعرفش !! .. والأغرب ان معظمهم بيبدأوا يتحولوا لما الساعة تيجي 12 بليل ..برضه ليه ؟؟ ما نعرفش .. كل الكتب وصفت المرض ده كده .. بس مفيش حد عرف سببه ولا اشمعنى الاطفال دول بيحصل لهم التحول المفاجئ ده 12 بليل  بالذات ..  سبحان الله

من اسبوع كده قالولي في العيادة ان البنات في الكول سنتر عايزين  يكلموك ضروري :

* خير يا جماعة

* فيه يا دكتور مريضة من سوريا غريبة جداً .. واحنا بنحجز لبنتها ميعاد للكشف قالت لنا كلام غريب جداً عايزين نقوله لك

* كلام غريب ايه ؟؟

* كل اما نقولها مثلاً " يوم السبت يناسب حضرتك يافندم ؟ " ..

تقول " لأ السبت مينفعش .. ده اليوم الحلو .. ممكن نخليه الأحد .. الأحد هو اليوم الوحش "

* الست دي يا دكتور جمال مقسمة الاسبوع لأيام حلوة وأيام وحشة .. ايه الموضوع ده ؟

انا طرت من الفرحة .. مصدقتش ابداً ان ربنا اداني العمر عشان اشوف لتالت مرة حالة

 Circadian Esotropia

مامتها بقى لقيتها عارفة كل حاجة .. عرفت حالة بنتها من النت .. قرأت كل حاجة اتكتبت عن المرض ده .. لدرجة انها قالت لي  " انا يا دكتور جمال بقيت باأكره الساعة 12 .. مامتها عرفت ان المرض ده مش معروف سببه ايه .. وعرفت ان كل المراجع الطبية أجمعت انه مالوش حل الا العملية .. جت لي من سوريا مخصوص عشان اعمل العملية لمايا .. فاكره ان انا كل يوم بأشوف حالات كتير زي بنتها .. مش عارفة ان انا فرحان بيها أكتر من انها فرحانة بيا ..

مامتها جت تكشف في اليوم الوحش .. بصراحة عندهم حق يسموه اليوم الوحش .. مايا عندها حول جامد قوي .. حددنا يوم العملية .. حسبناه مع بعض .. لقيناه يوم حلو .. قلت لمامتها ما تفرقش يا مدام .. المهم بعد العملية ان شاء الله تكون كل الايام حلوة

وحلمنا اتحقق يا جماعة .. مايا عملت العملية في اليوم المحدد .. وقلت لمامتها اشوفها في يوم من الايام اللي كانت زمان وحشة

مايا جت اللي النهاردة .. لا والله .. ده يوم جميل وحلو جداً كمان .. البنت ياجماعة بعد العملية زي القمر .. الحمد لله .. عملية تحفة والله

  حمد الله على سلامتك يا مايا ... عمليتك حلوة فعلاً .. وشكراً كمان مرة لبابا وماما انهم وافقوا اني انزل صورك على صفحتي

د. جمــال صبـــحي