حالة هذا الأسبوع ( 35 ) : الحاجة أ. أ  .. 58 سنة .. من القاهرة

" الحول والمية البيضا "

تليفون العيادة بيرن

-                              مين يافندم

-                              - " انا د. احمد شبانة يا دكتور جمال "

-                              - تحت امرك يا دكتور أحمد

- " عندي حالة يا دكتور جمال عندها مية بيضا في عينيها الاتنين .. بس العيانة عندها عينها الشمال فيها حول وحشي .. وكمان طالعة لفوق .. يعني حول وحشي معاه كمان حول رأسي ..  مش معنى كده ان العين الشمال الحولة دي كسلانة وضعيفة ومفيش داعي أعملها عملية المية وكفاية أعمل عملية المية في العين اليمين بس .. ولا ايه رأيك "

لأ طبعاً يا جماعة .. الموضوع مش كده بالظبط

لما يكون عيان عنده مية بيضا في عينيه الاتنين زي الست الطيبة دي .. عادة بتبقى فيه عين من عينيها جه عليها المية البيضا من زمان وهي كسلت تعملها عملية .. وقالت مش مهم مادام العين اليمين كويسة .. خلاص مش لازم عملية .. ما هو انا شايفة باليمين .. الحمد لله على كده .. طبعاً كلنا بنشوف العيانين دول ..  المهم لما العيان يسيب المية في عينه سنين كده ومايعملش المية ساعات نلاقي عينه حصل فيها حول وحشي .. وكتير برضه بنلاقيها بتطلع لفوق كمان .. زي الحاجة كده .. وبعدين تعدي سنة في التانية ونلاقي العين اليمين الحلوة ييجي عليها مية هي كمان .. ساعتها العيان يروح جري على الدكتور

" الحقني يا دكتور .. عيني اليمين اللى انا بشوف بيها ابتدا ييجي عليها مية

وبيبقى السؤال هنا :

هل نعمل المية البيضا في اليمين بس ولا كمان نعملها في العين الحولة اللي طالعة لفوق كده

-                              - طبعا يا دكتور أحمد تعمل المية البيضا في عينيها الاتنين .. بالنسبة للعين اللي فيها مية بيضا وحول هنحكم عليها بعد ما تعمل المية .. بعض المرضى يا دكتور احمد لما يعملوا عملية المية ونظرهم يتحسن بنلاقي الحول اتعدل لوحده .. وبعضهم نشيل المية ويفضل الحول زي ما هو ويحتاجوا عملية حول .. اعمل لها المية الأول يا أحمد في عينيها الاتنين وبعدين كلمني قولي ايه الاخبار

-                              دكتور احمد شبانة ياجماعة من أشطر الدكاترة عندنا في المعهد التذكاري .. ومن أشطر الدكاترة اللي بيعملوا عملية المية البيضا بجهاز الموجات الصوتية .. تقدر تقول عليه كده " الصاعد الواعد المتوعد "

-                              المهم .. احمد عمل عملية المية للحاجة .. ابتدا بالعين اليمين .. وبعدها باسبوع عملها العين الشمال .. عمليتين والله عشرة على عشرة .. زي الفل

-                              تليفون العيادة بيرن

-                              - اهلا وسهلا يا احمد .. ايه اخبار الحالة ؟

-                              - والله يا دكتور جمال عملتلها المية في عينيها الاتنين من اسبوعين كده .. العمليتين حلوين الحمد لله .. وكمان شايفة بعينها الشمال مش اليمين بس .. لكن الحول يا دكتور جمال فضل زي ما هو .. والحاجة مع انها 58 سنة مضايقة من شكلها قوي وعايزة تشوف حل في موضوع الحول ده .. انا عايز ابعتها لحضرتك

-                              - وايه المشكلة يعني 58 سنة ولا أكبر .. من حقها يا أخي يبقى شكلها حلو .. ليه لأ

-                              بعدها بأسبوع جت لي الحاجة وعملت لها عملية الحول .. طبعاً الحول الأفقي لما بيبقى معاه كمان حول رأسي بيحتاج حسابات تانية خالص .. وبيبقى الشغل أكتر .. وساعات بأحتاج أشتغل في العينين .. مش العين الحولة بس .. زي عملية الحاجة كده ..

-                              الحاجة جت لي النهاردة عشان أطمن عليها .. لا والله حاجة غير.. شكلها اتغير خالص .. ولقيتها مبسوطة جداً بالنيو لوك ده

-                              - تسمحي لي يا جميل تكوني حضرتك حالة هذا الأسبوع في صفحتي على الفيس ؟

-                              - طبعاً اسمح لك يا دكتور جمال .. تسلم ايديك

-                              الحمد لله رب العالمين

وحمد الله على سلامتك يافندم

د. جمــال صبـــحي