حالة هذا الاسبوع ( 157 ) ريتاج .. 11 شهر .. من بني سويف

" ممكن ريتاج تعمل ليزك بدل النضارة "

( بنتي عندها سنة وظهر عليها حول فجأة .. عينها بدأت تخش لجوه .. رحت لكذا دكتور كلهم قالوا ان عندها طول نظر وهو ده اللي عامل الحول .. وكلهم قالوا علاجها نضارة .. ملهاش علاج إلا النضارة .. معقول يا دكتور جمال .. بيبي في السن ده هنعرف نلبسها نضارة .. هي نفسها مش هترضى تلبس النضارة .. الناس هتضحك على منظرها بالنضارة .. دي عصبية جداً ومش هتسيبها على وشها .. دي هتكسرها كل شوية .. شوف أي حل تاني يا دكتور .. سمعنا في التليفزيون ان فيه دلوقتي عملية ليزك بتتعمل للأطفال دول بدل النضارة .. ممكن نعملها تصحيح نظر بالليزك في السن دي )

ده يا جماعه أشهر سؤال بيجيني يومياً على الفيس :

( ممكن نعمل ليزك للبيبيهات دول بدل النضارة .. والحول يتعدل ونرمي النضارة والدنيا تبقى بيس خالص ؟ )

والإجابة بتاعتي :

• لأ طبعاً مش ممكن نعمل ليزك للبيبيهات دول بدل النضارة

• ·     غلط نعمل ليزك للبيبيهات دول بدل النضارة

• ·     ممنوع طبياً نعمل ليزك للبيبيهات دول بدل النضارة

• ·     مينفعش طبعاً نعمل ليزك للبيبيهات دول بدل النضارة

كل يوم بنقول 100 مرة الكلام ده للأمهات .. الليزك فيه خطورة شديدة على عيون الأطفال .. الليزك ياجماعه مش بيتعمل قبل سن 18 سنة .. كل الدنيا عارفة كده .. كل البيبيهات اللي عملوا ليزك رجعوا لبسوا نضارة تاني .. ده إذا كانوا أصلا خرجوا سالمين من العملية .. بيانات طبية كتير أوي بتطلع كل يوم بتحذر الناس إنهم يعملوا ليزك لأطفالهم بدل النضارة .. عندنا في مصر طلع بيان طبي من كام شهر صادر عن الجمعية المصرية للحول وعيون الأطفال - والجمعية دي فيها أكبر دكاترة الحول المصريين - البيان كان بيحذر بشدة من الآثار الضارة لعمليات الليزك على عيون الأطفال وحذر البيان الآباء والأمهات من الإعلانات والبرامج المنتشرة اليومين دول في التليفزيون واللي بتدعي ان حول طول النظر اللي عند البيبهات بيتعالج بالليزك مش بالنضارة وده طبعاً كلام غلط في غلط وبيخالف كل الحقائق الطبية والمراجع العلمية المعروفة في العالم كله ..     

ماشي طيب ايه الحل ؟

علشان نتكلم عن الحل لازم نتكلم الأول عن حول طول النظر

كتير من البيبهات اللي عندهم طول نظر بيحصل لهم حول انسي .. يعني عينيهم تنحرف للداخل وده بيحصل عادة من عمر سنة لحد عمر أربع سنين تقريباً .. الحول ده اسمه ياجماعه حول طول النظر .. يعني طول النظر هو اللي عملهم الحول .. وعشان نعالج الحول لازم طبعاً نعالج طول النظر .. وعلاج طول النظر زي ما كلنا عارفين هو النضارة

والأطفال دول 3 انواع .. كل أب وأم لازم يعرفوا ابنهم من النوع الأول ولا من النوع التاني ولا من النوع التالت عشان يعرفوا طريقة العلاج:

1. النوع الأول : لما الطفل يلبس نضارة عشان نعالج طول النظر اللي عنده نلاقي الحول اختفى تماماً .. ولما يقلع النضارة الحول يظهر .. يبقى خلاص الطفل ده علاجه نضارة مش عملية حول .. وكل 6 شهور نشوف مقاس النضارة اتغير ولا لأ .. معظمهم نلاقي كل شويه طول النظر بيقل عن الأول .. ويفضل يقل شويه بشويه لحد ميبقاش عنده طول نظر خالص ويستغنى عن النضارة وطبعاً ساعتها مايبقاش فيه حول .. الولاد دول بيستغنوا عن النضاره على سن 10 أو 12 سنه بالكتير.

2. النوع التاني: برضه لما الطفل يلبس النضارة نلاقي الحول اختفى تماماً .. ولما يقلع النضارة الحول يظهر .. لكن لما بنشوفه كل 6 شهور نلاقي طول النظر مش بيقل ولا حاجه .. يعني الطفل هيفضل يلبس النضارة على طول عشان الحول مايظهرش .. الولاد والبنات دول اللي كبروا وطول النظر اللي عملهم حول لسه موجود مش معقول يعيشوا طول عمرهم بالشكل ده .. يلبسوا النضارة مفيش حول .. يقلعوا النضارة يبقى فيه حول .. لأ طبعاً لما يكبروا مش بنسيبهم كده .. دول بنعمل لهم ليزك أو تصحيح ابصار على سن 18 سنه مش قبل كده .. لأن ممنوع طبياً منعاً باتاً عمل ليزك بدل النضارة قبل سن 18 سنه لخطورته على عيون الأطفال زي ماقلنا .. ولما يعملوا ليزك ساعتها يبقى خلاص مفيش طول نظر .. يعني مفيش نضارة وطبعاً يبقى برضه مفيش حول

3. النوع التالت: لما الطفل يلبس النضاره نلاقي الحول لسه موجود .. أو نلاقي الحول قل شويه بس لسه موجود .. ومادام الحول لسه موجود حتى لما نلبس النضارة .. يبقى خلاص مفيش حل تاني للحول إلا عملية حول .. بس برضه بعد العملية هيلبس النضارة عشان طول النظر .. زيه زي أي حد عنده طول نظر ومحتاج نضارة عشان يشوف كويس.

ريتاج العسولة حالة النهاردة طلعت من النوع التالت .. يعني لما تلبس النضارة الحول بيقل شويه .. بس لسه موجود برضه مش بيروح خالص .. علاج النوع التالت اننا نعمل عملية حول عشان الحول يتعدل .. لأن الحول لو ما اتعدلش .. العين الحوله هتضعف ويحصل لها كسل .. بس برضه زي ما قلنا .. ريتاج بعد العملية هتلبس نضارة لحد أما طول النظر يخف لوحده على سن 12 سنة كده يا إما توصل للسن الآمن لعمل الليزك وهو18 سنة

الف حمد الله على سلامتك يا ريتاج

عمليتك حلوة أوي الحمد لله

ونضارتك كمان حلوة أوي

د. جمــال صبـــحي