حالة هذا الاسبوع ( 103 ) محمد ..  5 سنين .. من القاهره

" حول طول النظر "

الحول ده بيظهر عند الاطفال اللي عمرهم من سنتين لأربع سنين .. ساعات بيظهر قبل كده .. وساعات بيظهر بعد كده ..    لما بنكشف على الولاد دول بنلاقي عندهم طول نظر .. هو ده اللي عملهم الحول .. وعشان كده بنسميه حول طول النظر .. أو الحول الانسي التكيفي .. يعني لو الطفل لبس نضارة علشان نعالج طول النظر ده بنلاقي  الحول يتعدل لوحده  ..من غير عملية حول ولا حاجه

( أشهر سؤال بتسأله أمهات الولاد دول )

مادام النضارة بتعدل الحول .. ممكن نعمل ليزك بدل النضارة ؟

( طيب بالنسبة لموضوع الليزك )

لأ طبعاً مش ممكن الولاد دول نعمل لهم ليزك بدل النضارة .. أولاً الليزك مش بيتعمل للأطفال في السن دي .. الليزك بيتعمل على الأقل بعد سن 18 سنة .. زي ما كل دكاترة الليزك بيقولوا .. أكبر غلط ان الولاد دول يعملوا ليزك بدل النضارة .. هما لسه صغيرين ورقم النضارة بيتغير كل شويه وكل شويه يغيروا النضارة برقم مختلف .. طيب ايه الرقم اللي هيتعمل عليه الليزك دلوقتي ؟ .. ده كتير من الولاد دول لما نتابعهم كل 6 شهور نلاقي طول النظر بيقل عندهم شويه بشويه والحول طبعاً يقل برضه شويه بشويه لحد أما ييجي وقت نلاقي معندهمش طول نظر خالص ومعندهمش حول برضه .. ويقلعوا النضارة طبعاً ..   يبقى خلاص ياجماعه مينفعش أبداً الطفل اللي عنده حول طول النظر يعمل ليزك بدل النضارة .. مينفعش أبداً .. لما يوصل 18 سنة يبقى يعمل ليزك زي ماهو عايز .. .. انما دلوقتي لأ