حالة هذا الأسبوع ( 79 ) .. سارة توفيق 3 سنوات .. من القاهرة

" حول طول النظر "

حول طول النظر بيظهرعند الاطفال اللي عمرهم من سنتين لأربع سنين تقريباً  .. ساعات قبل كده وساعات بعد كده..

 طيب .. ايه علاقة طول النظر بالحول ؟

بعض الاطفال اللي عندهم طول نظر  بيعملوا مجهود عشان يشوفوا الحاجه كويس  .. فساعات يحصل لهم حول انسي  .. يعني عينهم تحول لجوه.. عشان كده بنسمي الحول ده " حول طول النظر " .. يعني ببساطه شديدة لو عالجنا طول النظر الحول بيتعدل لوحده .. يعني لما الطفل ده يلبس نضارة مش هيعمل أي مجهود عشان يشوف الحاجه .. وبالتالي نلاقي الحول بيتعدل فوراً لما يلبس النضارة  ..زي سارة كده .. شوفوا ازاي الحول اللي عندها اختفى تماماً لما لبست النضارة

طيب هي سارة هتفضل كده طول عمرها لما تلبس النضارة عينها تتعدل .. ولما تقلع النضارة عينها تحول لأ طبعاً .. طول النظرعند الاطفال دول بيتحسن ويقل شويه بشويه .. والنضارة طبعا بيفضل مقاسها يقل ويتحسن برضه شويه بشويه .. لحد ما ييجي وقت نلاقي مفيش طول نظر خلاص ..فيخف الحول طبعاً .. وساعتها نبطل نلبس النضارة

طيب هما الولاد دول مينفعش نعملهم عملية ؟

لأ طبعاً مينفعش .. مادام الحول بيتعدل تماماً بالنضارة يبقى مفيش عمليات .. بنعمل عملية في حاله واحده بس .. لو الطفل لبس النضارة بتاعته والحول ما اتعدلش .. يبقى لازم عملية .. حتى لو الحول اتحسن شوية بس ما اختفاش تماما ًبعد لبس النضارة يبقى برضه لازم عملية ..

سارة ظهر عندها الحول ده من شهر كده .. مامتها جت لي العيادة مخضوضة جداً .. كشفت على سارة .. لقيت عندها طول نظر .. قلت لمامتها تسعين في المية يا مادام سارة مش هتعمل عملية .. ان شاء الله الحول هيتعدل بالنضارة .. كتبت لها مقاس النضارة وقلت نشوف .. ربنا يسهل

سارة جت تاني بعد اسبوع .. فعلاً طلع عندها حول طول نظر .. بمجرد أما تلبس النضارة ما يبقاش فيه حول خالص .. الحمد لله .. نبص عليها بقى كل 6 شهور ونتابع طول النظر وهو بيقل بالتدريج لحد أما تكبر شوية وتقلع النضارة ان شاء الله على سن 12 سنة كده

حمد الله على سلامتك يا بنتي

د. جمــال صبحــي