حالة هذا الأسبوع ( 325 )

" شلل العصب السادس "

العصب السادس هو اللي بيحرك العضلة الخارجية للعين .. العضلة دي هي اللي بتحرك العين لبره .. يعني العين اللي فيها شلل في العصب السادس مش بتعرف تتحرك لبره .. وطبعاً العين بيكون فيها حول انسي عشان العضلة الخارجية فيها شلل .. فالعضلة الداخلية بتكون أقوى فتشد العين ناحية الأنف .. ومرضى شلل العصب السادس كمان بيبقوا مش عارفين يبصوا للجنب .. عشان كده المرضى دول نلاقيهم دايماً عاوجين رقبتهم ولما يبصوا للجنب بيبصوا براسهم مش بعينيهم

ومن أشهر أسباب مرض العصب السادس مرض السكر فلازم المرضى دول يعملوا تحليل عشان نعرف السكر عندهم عالي ولا لأ .. ولو عالي بنحولهم لطبيب باطني

وتاني أسباب شلل العصب السادس هو أمراض المخ وإصابات الرأس .. فلازم المرضى دول برضه نعمل لهم اشعة على المخ عشان نتأكد ان المخ سليم .. ولو فيه حاجه بنحولهم لطبيب المخ والأعصاب

وفي جميع الأحوال لازم نستنى 6 شهور على الأقل بعد ظهور الشلل قبل مانفكر نعمل عملية لإصلاح الحول لأن فيه كتير من المرضى دول بيخفوا لوحدهم بأدوية المخ والأعصاب من غير عمليات ولا حاجه

طيب العمليه في شلل العصب السادس بتعمل ايه ؟

صحيح العضلة المشلولة دي مش بنعرف نعالجها .. لكن الحل في الحالات دي اننا بناخد شوية ألياف من العضلات التانية السليمة في نفس العين ونحطها مع العضلة المشلولة عشان تساعدها شوية في الحركة .. بنسمي العملية دي عملية نقل عضلات

نتيجة عملية نقل العضلات بتكون معقولة جداً .. أولاً الحول الأنسي بيتعدل .. ثانياً المريض بيعدل رقبته ومش بيعوجها تاني .. وثالثاً وده الأهم المريض لما ييجي يبص لبره العين بتتحرك لبره بدرجه معقولة في معظم الحالات