حالة هذا الأسبوع ( 240 ) أسيل اسلام .. سنه ونص ..  من سوهاج

" شلل العصب السادس "

البيبي القمر دي وهي عندها 3 شهور اتعرضت لحادثة سيارة فظيعة هي ومامتها وباباها.. خرجت من الرعاية بعد كام يوم عينيها الاتنين فيها حول انسي يعني داخله لجوه .. اتشخصت في الصعيد انها عندها شلل بالعصب السادس في عينيها الاتنين نتيجة اصابة الدماغ

زي ما شرحت لحضراتكم قبل كده العين بتتحرك ازاي .. العين بيحركها 3 اعصاب خارجين من المخ .. العصب التالت والرابع والسادس

اكتر عصب بيتأثر بإصابات الرأس من الحوادث هو العصب السادس .. والعصب السادس هو اللي بيحرك العين لبره ..  والعين اللي فيها شلل في العصب السادس  طبعاً مش بتعرف تتحرك لبره .. والعين بيكون فيها حول انسي داخلي عشان العضلة الخارجية مشلوله وضعيفه والعضلة الداخلية بتكون أقوى .. فتشد العين للداخل ناحية الأنف .. والعيان بيكون مش عارف يبص للجنب .. زي أسيل كده .. عشان كده العيانين دول اللي عندهم شلل العصب السادس نلاقيهم دايماً عاوجين رقبتهم

أسيل باباها جاني من سوهاج من حوالي 8 شهور ..  بعد الحادثة ب 3 شهور .. في حالات شلل العصب السادس لازم نستنى على علاج المخ والأعصاب على أمل ان العصب يرجع يشتغل لوحده من غير عملية .. لكن لو عدا على الإصابة سنة والعصب فضل مشلول زي ما هو .. يبقى خلاص مش هيشتغل خلاص .. لازم نعمل العملية .. قلت لباباها لازم نستنى سنة بعد الحادثة يمكن العصب يشتغل

بعد ما عدا سنة على الحادثة أسيل جت لي تاني .. الحول زي ما هو .. العصب لسه مشلول في العينين

انا كلمت باباها بصراحه .. قلت له هو صحيح العضلة المشلولة دي مش بنعرف نعالجها .. لكن الحل في الحالات دي بنضعف العضله الداخليه عشان ماتشدش العين لجوه .. وبناخد شوية الياف من العضلات التانية السليمة ونحطها مكان العضلة المشلولة

المهم .. توكلت على الله .. عملت العملية لأسيل .. بصراحة النتيجة طلعت أفضل مما كنت أتصور وأتمنى .. الحمد لله .. البنت عدلت رقبتها .. والعين بتتحرك لبره .. والحول الانسي راح خالص

حمد الله على السلامة يا حبيبتي .. والف مبروك