حالة هذا الأسبوع ( 363 )

مالك عبد ربه .. 12 سنة  من قنا

" شلل العصب الثالث "

العين بيحركها يا جماعه 3 اعصاب طالعة من المخ .. العصب التالت والعصب الرابع والعصب السادس .. طبعاً كلهم مهمين .. بس أهم واحد فيهم هو العصب التالت .. ليه ؟ .. العصب التالت بيحرك لوحده اربع عضلات من العضلات الستة اللي بتحرك العين .. والعصب التالت برضه هو اللي بيحرك العضلة اللي بترفع الجفن لفوق
وعشان كده لما بيحصل شلل في العصب التالت بنلاقي العين مش عارفه تتحرك تقريباً في أي اتجاه لأن فيها اربع عضلات مش شغالين .. فنلاقي العين فيها حول وحشي وثابتة في مكانها ..  وبنلاقي حاجة كمان مهمة جداً في حالات العصب ىالثالث .. بنلاقي العين نازلة لتحت وفيه ارتخاء في الجفن

وعشان العصب التالت طالع من المخ  فدايماً أول حاجة بنعملها لما نشوف العيانين دول .. اننا بنخليهم يعملوا اشعة على المخ عشان نتأكد الأول ان المخ سليم

طيب شلل العصب الثالث علاجه ايه ؟

المرضى دول بيكون علاجهم عمليتين .. عملية للعين عشان الحول وعملية تانية عشان ارتخاء الجفن
العملية بيكون الغرض منها هو تثبيت العين في الوضع الامامي عشان العيان يعرف يبص قدامه ويتعامل مع الناس ويتفرج على التليفزيون والموبايل ويقرأ وكده .. لكن حتى بعد العملية العين برضه مش بتتعرف تتحرك لمعظم الاتجاهات بس بتكون مظبوطه في الوسط

دي صورة مالك بعد العملية بشهر تقريباً .. الحمد لله .. بقى زي الفل .. بالنسبة للحول وارتخاء الجفن بقى عشرة على عشرة

حمد الله على سلامتك يا ابني .. وربنا يوفقك