حالة هذا الأسبوع ( 171 ) عبد الله خيري .. 4 سنين  من دشنا

" شلل العصب الثالث "

احنا عارفين من قبل كده ان العين بيحركها 3 اعصاب طالعة من المخ .. العصب التالت والعصب الرابع والعصب السادس .. طبعاً كلهم مهمين .. بس أهم واحد فيهم هو العصب التالت .. ليه ؟ .. العصب التالت بيحرك لوحده اربع عضلات من العضلات الستة اللي بتحرك العين .. والعصب التالت برضه هو اللي بيحرك العضلة اللي بترفع الجفن لفوق .. يعني هو اللي بيخلي العين تفتح .. 
وعشان كده لما بيحصل شلل في العصب التالت بنلاقي العين مش بتتحرك تقريباً في أي اتجاه لأن فيها اربع عضلات مش شغالين .. فالعين بيكون فيها حول وحشي يعني العين بتكون حادفة لبرة ونازلة لتحت وبتكون ثابتة في مكانها مش بتتحرك ..  يدوبك بتتحرك حاجة بسيطة جداً .. تخيلوا .. اربع عضلات مش شغالة من مجموع ست عضلات ..  وبنلاقي حاجة كمان مهمة جداً في العيانين دول .. بنلاقي عندهم ارتخاء في الجفن العلوي والعين مش بتعرف تفتح عادي ..  
طيب ايه هي اسباب شلل العصب التالت عند الأطفال ؟

عشان العصب التالت طالع من المخ  فدايماً أول حاجة بنعملها لما نشوف الأطفال دول .. اننا بنخليهم يعملوا اشعة على المخ عشان نتأكد الأول ان المخ سليم

وده اللي حصل مع عبد الله .. اتأكدنا الأول ان المخ سليم وان شلل العصب التالت اللي عنده مش سببه مرض في المخ الحمد لله .. شلل خلقي زي أي مرض خلقي تاني .. يعني الطفل بيتولد كده

طيب شلل العصب التالت علاجه بيكون ازاي ؟

الأطفال دول بيكون علاجهم عمليتين بيتعملوا في نفس الوقت .. عملية للعين عشان الحول وعملية تانية عشان ارتخاء الجفن عشان العين تفتح عادي
وعشان العين بيكون فيها حول وحشي جامد ونازلة لتحت .. فعملية الحول بيكون الغرض منها هو ظبط العين في الوضع الامامي عشان الطفل يعرف يبص قدامه بعينيه الاتنين ويتعامل مع الناس ويتفرج على التليفزيون والموبايل ويقرأ وكده .. وبكده نكون حافظنا على وظيفة العين وفي نفس الوقت خلينا الطفل شكله طبيعي   

دي صورة عبد الله بعد العملية آخر مرة كان عندي .. الحمد لله .. بقى زي الفل .. الحول اتعدل تماماً في الاتجاه الأمامي وكمان الجفن ارتفع والعين فتحت عادي .. آخر حاجه بنعملها دلوقتي هي تمارين لتنشيط العين اليمين لأن الحول اللي بقاله 4 سنين كان عمل ضعف وكسل في العين .. بس عبد الله لسه صغير والكسل ده أكيد هيتحسن ان شاء الله .. حمد الله على سلامتك يا ابني .. عمليتك ممتازة والله

د جمــال صبحي